Сув ресурслари бўйича экспертлар учун элчихона ташкил этган дастурнинг (АWEP) иккинчи сессияси ирригация, гидроэнергетика ва сув ресурсларини оптималлаштириш ўртасидаги ўзаро боғлиқликка эътибор қаратилиши туфайли муваффақиятли ўтди.
1 декабрь куни АҚШнинг Тошкентдаги элчихонаси ва АҚШ Ички ишлар вазирлиги биргаликда сув ресурсларини бошқариш масалаларини чуқурроқ тушунишга қаратилган учта сессиянинг иккинчисини ўтказдилар. Унда Тошкент ирригация ва қишлоқ хўжалигини механизациялаш муҳандислари институти, Ирригация ва сув муаммолари илмий-тадқиқот институти, шунингдек, Сув хўжалиги, Қишлоқ хўжалиги вазирликлари, Космик тадқиқотлар ва технологиялар агентлиги (ЎзКосмос) вакилларидан иборат 47 қатнашчи иштирок этди.
AWEP сессияси АҚШ қишлоқ хўжалиги вазирлиги қошидаги Табиий ресурсларни муҳофаза қилиш хизмати ходими Брент Дрейпернинг суғориш турлари ҳақидаги тақдимоти билан бошланди. Тақдимот чоғида муҳандис Дрейпер Ўзбекистонда сув оқимининг кўп, кам ва нормал бўлган мавсумларида сув ресурсларини қандай бошқариш, сув танқис мавсумларда сувни тежаш учун ҳамда экин ва яйловларда ҳосилдорликни ошириш учун ротация услубидан қандай фойдаланиш ва ўта қурғоқчилик шароитида ҳосилни қандай сақлаш кераклигини бир стакан сув мисолида намойиш этган.
Шунингдек, Айдаҳо миллий лабораторияси вакили Томас Мозиер қувурларга каналлар қазиш орқали сув ресурсларини бошқариш, сув етказиш йўлларини такомиллаштириш харажатлари ва гидроэнергетика билан ўзаро боғлиқлик ҳамда муайян маҳаллий ва ҳудудий эҳтиёжлар учун суғоришни модернизация қилиш муҳимлиги ҳақида сўз юритди.
АҚШ Энергетика вазирлигининг Тинч океани шимоли-ғарбий лабораторияси (PNNL) ходими Бо Солсбери гидроэнергетика ирригацияни модернизация қилишга қандай ҳисса қўшиши ва модернизация лойиҳаларида давлат-хусусий шерикликнинг таъсирини чуқур таҳлил қилди ҳамда АҚШ назарияни амалиётга татбиқ этган реал лойиҳалардан мисоллар келтирди.
PNNL лабораториясида ишлайдиган информацион технологиялар бўйича мутахассис Жеймс Кершоу суғоришни режалаштириш ва сув сизиб ўтиши ва буғланишни камайтириш учун юқори даражадаги таҳлиллардан фойдаланадиган махсус «IrrigationVIZ» дастурий воситасидан қўллаш ҳақида гапирди. Ўзбекистондаги ҳамкасблар учун тақдим этилиши мумкин бўлган ушбу дастурий восита асосан Қўшма Штатларда ҳарорат, тупроқ шароити, дарёлар ва бошқа маълумотларга оид ҳукумат маълумотларидан фойдаланган ҳолда сув ресурсларини бошқаришда фойдаланилади.
AWEPнинг 15 декабрга белгиланган учинчи сессиясида мутахассислар ГИС ёрдамида таҳлил ва мониторинг усулларини ҳамда экинлар учун сув сатҳини аниқлаш ва сув ресурсларини умумий бошқариш учун сунъий йўлдош технологияларидан фойдаланишни муҳокама қиладилар.
