Вақтинча ишлаш визалари (H, L, P ва O визалари)
АҚШда вақтинча ишлаш учун аниқ бир турдаги визалар талаб қилинади. Шу турдаги визаларнинг аксарият қисми иш берувчи ёки агентлик визага мурожаат этувчи учун петицияни олдиндан тайёрлаши кераклигини талаб қилади. Петиция АҚШ Иммиграция ва Фуқаролик Хизмати (USCIS) томонидан визага мурожаат қилишдан аввал маъқулланиши керак. Петициялар ҳақида тўлиқ маълумотни USCIS сайтидаги вақтинча ишлаш, ҳамда чет эл фуқароларини қисқа муддатга ишга олиш саҳифаларида (PDF 742 KB) топиб олишингиз мумкин.
Талаб этиладиган ҳужжатлар
Вақтинча ишлаш тоифасидаги визаларга мурожаат этиш учун қуйидаги ҳужжатларни топшириш талаб этилади:
- DS-160 электрон анкета. Бу анкета https://ceac.state.gov/genniv манзилида электрон равишда тўлдирилиши керак. Бу анкета, шунингдек, суҳбатга ёзилиш учун ҳам керак бўлади. Анкетанинг тасдиқлов варағини принтерда чоп этиб, суҳбатингизга олиб келинг. Тасдиқлов варағидаги штрих код қандай кўринишда бўлиши кераклигини мана бу расмда кўринг.
- Хорижий сафарлар учун яроқли бўлган паспорт.
- Сўнгги 6 ой мобайнида олинган фотосурат (фотосуратлар 5Х5 см ҳажмда ва оқ фонда бўлиши керак). Фақат асл фотосуратлар қабул қилинади. Бирор усул билан ўзгартирилган (нусхаси олинган, сканер орқали тайёрланган, ўзгартирилган ва ҳоказо) фотосуратлар қабул қилинмайди. Қўшимча маълумотлар учун фотосуратларга талабларни (PDF-93kb) кўринг. DS-160 анкетаси фотосуратни анкетага Интернет орқали бириктириш имконини беради. Консуллик Бўлими фотосурат анкетага бириктирилган тақдирда ҳам асл фотосуратни суҳбатга олиб келишни тавсия этади. Бу анкета тўлдирилгандан кейин техник носозликлар олдини олиш учун қилинади.
- Петиция – I-129 шакли ёки I-797 қарор хабарномаси. Бу ҳужжат Давлат Хавфсизлиги Департаментида мурожаат этувчининг бўлажак иш берувчиси томонидан расмийлаштирилади.
- Агар юқорида кўрсатилган икки шакл бўлмаса, мурожаат этувчилар Консуллик Бўлими билан электрон почта орқали боғланиб, петициянинг рақамини тақдим этишлари керак. Петиция маълумотлари Консуллик Бўлимига ички маълумот алмашув тизими орқали етказилган бўлса, Консуллик Бўлими мурожаат этувчини бундан хабардор этади. Петиция маълумотлари Консуллик Бўлими ихтиёрида бўлганда, I-129 ёки I-797 шаклларини топшириш шарт бўлмайди.
- Вақтинча ишлаш визасига мурожаат этувчи билан биргаликда визага мурожаат этувчи оила аъзолари (турмуш ўртоқлар ёки фарзандлар) учун қариндошлик ришталари борлигини тасдиқлайдиган ҳужжатлар, мисол учун турмуш қурганлик тўғрисидаги ёки туғилганлик ҳақида гувоҳномалар.
- Асосий мурожаат этувчининг ўзи оила аъзолари билан суҳбатга кирмаган ҳолларда, оила аъзолари суҳбатларига асосий мурожаат этувчининг АҚШдаги мақоми ва ишлаётганининг исботи билан киришлари керак.
Тўловлар: Ҳар бир визага мурожаат этувчи учун 190 АҚШ доллар.
