Мен “суҳбатсиз визага мурожаат этиш” дастурида кўрсатилган талабларга жавоб бераман. Лекин сўнгги олган визамдан кейин, мен яна бир бор визага мурожаат этдим. Лекин бу мурожаатим рад этилди. Мен шу ҳолатда ҳам мазкур дастур асосида мурожаат этишим мумкинми?
Афсуски, агар сизнинг аввал олган виза тури бўйича навбатдаги мурожаатингиз рад этилган бўлса, сиз бу дастур асосида визага мурожаат эта олмайсиз. Агар визага мурожаат этиш ниятида бўлсангиз, консул қабулига онлайн равишда суҳбатга ёзилишингиз лозим.
Мен сўнгги икки йил ичида ноиммиграцион виза олганман. Лекин яқинда мен ўз паспортимни янгиладим. Паспорт маълумотим ўзгарганлиги менинг ушбу дастур асосида визага мурожаатимга тўсқинлик қилиши мумкинми?
Тўсқинлик қилмайди. Агар сиз “суҳбатсиз визага мурожаат этиш” дастурининг бошқа талабларига жавоб берсангиз, паспорт маълумотингиз ўзгарганлигига қарамай, дастурда иштирок этишингиз мумкин.
Менинг 14 ёшга тўлмаган ўғлим ёзги таътилга АҚШга бормоқчи. Унинг онаси эса унга сафарда шерик бўлиш ниятида, лекин у илгари ноиммиграцион виза олмаган. Бу ҳолатда биз қандай йўл тутишимиз лозим?
Афсуски, на сизнинг ўғлингиз, на унинг онаси дастур талабларига жавоб бермайди. Бирок, фарзандингиз онаси консул билан суҳбат учун тонгги қабулга ёзилиб, суҳбатга фарзандининг ҳужжатларини олиб келиши мумкин. 14 ёшгача тўлмаган фарзандни суҳбатга ўзи билан олиб келиш талаб этилмайди.
Мен “Суҳбатсиз визага мурожаат этиш” дастури талабларига жавоб бераман. Менинг турмуш ўртоғим паспорт ва ҳужжатларимни ўрнимга топшириши мумкинми?
“Суҳбатсиз визага мурожаат этиш” дастури асосида визага мурожаат этмоқчи бўлган шахслар ўз паспорт ва ҳужжатларини шахсан топширишлари лозим. Бу ҳолат учун қуйидаги истиснолар мавжуд: 1) 79 ёшдан катта бўлган мурожаат этувчилар учун уларнинг оила аъзолари ўзлари визага мурожаат этиш-этмасликларидан қатъий назар ҳужжатларни қабулга ёзилиб топширишлари мумкин; 2) “Суҳбатсиз визага мурожаат этиш” дастури асосида гуруҳ сифатида мурожаат этувчиларнинг битта аъзоси барча гуруҳ аъзолари учун ҳужжатларни топшириши мумкин.
Мен олдин виза олганман, лекин паспортимни янгилаганлигим сабабли визани қачон олганлигим эсимда йўқ. Сўнгги визам муддатининг тугаш санасини қандай билишим мумкин?
Сўнгги олинган виза муддатининг тугаш санасини аниқлаш учун сиздан ConsularTashkent@state.gov электрон манзили орқали консуллик бўлими билан боғланиш ва ўз мурожаатингизда тўлиқ исмингиз ва туғилган санангизни кўрсатиш талаб этилади.
Ўтган йили менга А2 визаси берилган. Ҳозирда мен В1/В2 визасига мурожаат этмоқчиман. А2 визаси учун мендан бармоқ излари топшириш талаб этилмаган. Шу боисдан, мазкур мурожаатимда консул қабули учун суҳбатга ёзилишим керакми?
Албатта. Агар сиз В1/В2 виза турига мурожаат этмоқчи бўлсангиз, сиздан бармоқ изларини топшириш талаб этилади. Сизнинг сўнгги визага мурожаатингизда бармоқ излари олинмаганлиги сабабли, айни пайтда сиз мазкур дастур асосида визага мурожаат эта олмайсиз.
Менинг “суҳбатсиз визага мурожаат этиш” дастури бўйича қилган мурожаатим дастур талабларига жавоб бермаганим сабабли рад этилди. Энди мен консул билан суҳбат ўтиш учун навбатга ёзилмоқчиман. Суҳбатим учун мен қайтадан 160 АҚШ доллари тўлашим керак бўладими?
Йўқ. Агар сиз топширган анкетангиз билан мурожаат этаётган бўлсангиз, сиздан қўшимча тўловни амалга ошириш талаб этилмайди. Суҳбатга ёзилгандан сўнг, ўзингиз билан керакли ҳужжатлар билан бирга тўлов учун олган квитанциянгизни олиб келишни унутманг. Бироқ, агар сиз бошқа виза тоифасига бошқа сафар мақсади билан мурожаат этаётган бўлсангиз, янги тўловни амалга оширишингиз талаб этилади.
