Мен АҚШ ҳудудида иш сафари ёки туристик визам билан қанча бўлишим мумкин?
Ноиммиграцион виза АҚШнинг кириш портига (аэропорт, денгиз порти) бориш учун рухсат беради. Портга кирганингиздан сўнг, сизнинг АҚШга кириш ёки кирмаслигингизни ҳал қилувчи АҚШ божхона ва чегара текширув бюроси ходими сизни АҚШ ҳудудида қанча бўлишингиз мумкинлигини белгилайди. АҚШнинг кириш портига визангизнинг сўнгги кунида ҳам кириб келишингиз мумкин. Визанинг яроқлилик муддати сизнинг АҚШ ҳудудида туриш вақтингизга боғлиқ эмас. Шунга аҳамият бериш лозимки, визада кўрсатилган муддат сизга АҚШ ҳудудида туриш мумкин бўлган вақтни англатмайди. АҚШда бўлиш мумкин бўлган вақтни фақат божхона ва чегара текширув бюроси ходими белгилаши мумкин. Агар сизнинг АҚШ ҳудудида ўтказган вақтингиз анкетангизда кўрсатилган вақтдан сезиларли даражада кўпроқ бўлса, сизнинг келажакда АҚШ визасига қилган мурожаатларингизга салбий таъсир ўтказиши мумкин.
Менинг туристик (В-1/В-2) визам муддати АҚШга режалаштирган сафар кунимдан сўнг тугайди. Мен кетишимдан олдим янги визага мурожаат этишим шартми?
АҚШга визанинг сўнгги кунига қадар кетиш мумкин. АҚШга киришингизда у ерда туриш муддатингизни божхона ва чегара текширув бюроси ходими белгилайди. Визангиз муддати сиз АҚШ ҳудудида эканлигингизда ҳам тугаши мумкин. Муҳими сиз АҚШга кириб келганингизда масъул ходим сизга белгилаган муддатдан кўпроқ турмаслигингиз.
Визамнинг муддати 6 ойда якунланади. Виза якунлангунга қадар кутишим шартми ёки эртароқ янги визага мурожаат этишим мумкинми?
Виза муддати якунланишини кутиш шарт эмас. Паспортингиздаги виза ҳали яроқли бўлган пайтда ҳам янги визага мурожаат этишингиз мумкин.
Менинг визам мен бошқа ташкилотда ишлаётган пайтимда берилган эди. Ҳозир мен ўз иш жойимни ўзгартирдим ва менинг ҳозирги ишхонам мени АҚШга кейинги ой бўладиган конференцияга юбормоқчи. Мен бу сафар учун ўзимда бор визадан фойдалансам бўладими ёки янги визага мурожаат этишим лозимми?
Агар сизга берилган виза иш сафари учун ёки туристик бўлса, сиз ўша виза билан АҚШга бориб келишингиз мумкин.
Менинг фарзандим АҚШ визасига биринчи бор мурожаат этмоқда. Мен унга шерик бўлиб суҳбатга киришим мумкинми?
Мумкин. Ёш мурожаат этувчилар билан уларнинг ота-оналари суҳбатга шерик бўлиб киришлари рухсат этилади. 16 ёшга етмаган мурожаат этувчилар ота-оналаридан бирортаси ёки расмий вакиллари билан келишлари шарт. Визага мурожаат этувчи шахс, ёшидан қатъий назар (ҳатто ёш болалар ҳам) Интернет орқали суҳбатга ёзилиш тизимидан фойдаланиб суҳбатга ёзилиши шарт. Балоғат ёшига етмаган болаларга ҳамроҳ бўлиб кираётган катталар ўзлари визага мурожаат этмаётган бўлсалар ҳам, рўйхатга ёзилишлари талаб этилади. Ҳамроҳ бўлиб кираётган катта киши, агар ўзи ҳам визага мурожаат этаётган бўлмаса, анкета тўлдириши шарт эмас. Суҳбатга рўйхатга ёзилиш учун ушбу ҳамроҳ бўлиб кираётган катталар электрон почта орқали consulartashkent@state.govманзилига хат ёзиб, унда ўзларининг тўлиқ исм-шарифлари, кимга ҳамроҳ бўлиб кираётганлари ва паспорт рақамларини юборишлари керак. Хатда, 16 ёшга етмаган мурожаат этувчининг қайси кунга суҳбатга ёзилгани аниқ кўрсатилиши керак.
Менинг фарзандим АҚШда ўқийди. Мен у билан бирга яшашим мумкинми?
Сиз В-1/В-2 тоифали виза билан АҚШга бориб, фарзандингизни кўриб келишингиз мумкин. Лекин ўзингиз токи иммиграцион, вақтинчалик иш ёки талабалик визасига эга бўлмагунга қадар фарзандингиз билан АҚШда яшай олмайсиз.
Туристик виза билан АҚШга бориб у ерда таълим олишим мумкинми?
Тартиб бўйича, АҚШда ўқиш учун талабалик визасига эга бўлиш лозим. Лекин агар ўқув дастури якунида диплом берилмаса ва ўқиш ҳафтасига 18 ўқув соатидан ошмаса, сиз туристик виза билан АҚШда дарсга қатнашишингиз мумкин. Бундай ҳолатларда сиз туристик визага мурожаат қилишингиздан олдин ўқиш жойидан сизга туристик виза билан ўқишга рухсат берилишини кўрсатувчи ҳужжат сўрашингиз лозим.
Режалаштирилган сафаримдан қанча олдин мен визага мурожаат этишим лозим?
Биз сафарга ўз вақтида тайёргарлик кўришгизни тавсия этамиз. Визага режалаштирилган сафардан қанча олдин мурожаат этиш ҳақида қатъий тартиб йўқ. Ўзбекистон Республикаси фуқаролари учун одатда виза кўп маротабали бўлиб, у бир йилга берилади.
Мен қариндошларимни ақшга меҳмонга таклиф қилмоқчиман. Бунинг учун уларга таклифнома юборишим керакми? Бундан ташқари яна қандай талаб этиладиган ҳужжатлар бор?
Бизнес ёки туризм мақсади билан АҚШ визасига мурожаат қилишда таклифномалар талаб этиладиган ҳужжатлар сирасига кирмайди ва шу сабабли Консуллик Бўлими бу хатларнинг тузилиши бўйича ҳеч қандай талаблар ўрнатмаган. Консуллик Бўлими, шунингдек, таклифномани тақдим этувчилар мурожаат этувчининг ҳаракатлари учун жавобгарликни ўз зиммаларига олган деб ҳисобламайди.
