2021 йил 14 январь, Тошкент, Ўзбекистон – Халқ таълими вазирлиги АҚШ Халқаро тараққиёт агентлиги (USAID) билан ҳамкорликда мактаб ўқувчилари учун синфлар ва фанлар бўйича ўзлаштиришнинг янги стандартларини жорий этмоқда. Хар бир синф даражасида ўқувчилар билимини аниқ талаблар асосида белгилаш вазирликка керакли кўникмаларни ўргатадиган ўқув дастурлари, дарсликлар ва ўқитувчилар учун қўлланмаларни ишлаб чиқиш имконини беради. Бу Ўзбекистон иқтисодиётида муваффақиятли бўлиши учун зарур бўлган танқидий фикрлаш, муаммоларни ҳал қилиш ва амалий кўникмаларга эга бўлган мактаб битирувчиларини етиштириб берадиган сифатли таълим тизимини яратишнинг фундаментал элементларидан биридир.
Жорий йилнинг 14 январидан 1 февралгача бўлган даврида таълим соҳасининг 60 дан ортиқ мутахассислари Халқ таълими вазирлиги ва USAID томонидан молиялаштирилган “Ўзбекистонда баркамоллик учун таълим дастури” билан ҳамкорликда ўтказиладиган таълим стандартларини тақриз қилиш бўйича семинарда иштирок этади. Семинарнинг мақсади вазирлик ходимларини она тили ва математика фанларидан (1-4 синфлар учун) ҳамда информатика ва ахборот технологиялари фанидан (1-11 синфлар учун) таълим стандартларининг лойиҳасини тақриз қилишга тайёрлашдан иборат.
«Ушбу семинар ходимларимизнинг она тили, математика ва информатика ва ахборот технологиялари фанларидан таълим стандартлари лойиҳаларини пухта тақриз қилиш малакасини оширади. Аниқ стандартлар асосида ўқитиш ва билим олиш юқори сифатли таълим стандартлари асосини ташкил этади ҳамда ўқувчиларнинг билим олишдаги натижаларини янада яхшилайди», деди Халқ таълими вазирлигининг Республика таълим маркази директори Шуҳрат Сатторов.
Халқ таълими вазирлиги умумий ўрта таълим тизимини тизимли ва комплекс ислоҳ қилишнинг улкан дастурини амалга оширишни ўз олдига мақсад қилиб қўйган. USAID вазирликни ислоҳотларни амалга оширишда қўллаб-қувватлаш учун 2019 йилнинг декабр ойида тўрт йиллик “Ўзбекистонда баркамоллик учун таълим дастури” нинг ижросини бошлади. Дастур АҚШнинг Research Triangle Institute (RTI) ва унинг ҳамкорлари бўлган Флорида давлат университети ва Миссиссиппи давлат университети томонидан амалга оширилади.
Дастур ҳақида қўшимча маълумот учун қуйидаги ҳаволага ўтинг:
https://www.usaid.gov/uzbekistan/fact-sheets/education-excellence ёки боғланинг:
Ойбек Қурбонов – Бош директор муовини – Ўзбекистонда Баркамоллик учун таълим дастури
Телефон: 998-972-247-904
Email: okurbanov@ueep.rti.org
# # #
USAID Ўзбекистон Ҳукумати билан мамлакат иқтисодиётини диверсификация қилиш ва минтақавий савдони кўпайтириш, соғлиқ учун жиддий таҳдидларни, шу жумладан, COVID-19ни бартараф этиш ҳамда ҳукуматнинг аҳоли эҳтиёжларини таъминлаш борасида салоҳиятини ошириш масалалари бўйича ҳамкорлик қилади. Қўшимча маълумот олиш учун https://www.usaid.gov/uzbekistan ҳаволасига ўтинг.
