19 декабрь 2017й. – “Истиқболли авлод” нодавлат ташкилоти амалга оширган АҚШ Халқаро тараққиёт агентлиги “Одам савдосидан жабр кўрганларни реинтеграция қилиш” лойиҳасининг муваффақиятли якунига бағишланган анжуманда элчи Памела Спратлен сўзга чиқди. “Одам савдосига қарши курашиш – реинтеграция ва самарали амалиёт” номли икки кунлик анжуманда ҳукумат, нодавлат, хусусий ва халқаро ташкилотлардан 45 нафар вакил иштирок этди.
Олти йилдан ортиқ вақт мобайнида “Одам савдосидан жабр кўрганларни реинтеграция қилиш” лойиҳаси бу жиноятдан азият чеккан жабрдийда аёлларга кўмаклашиб, ижтимоий заиф аёлларнинг одам савдоси билан шуғулланувчилар қўлига тушишининг олдини олиб келди. “Истиқболли авлод” жамоаси одам савдосидан омон қолган ва унинг қурбонига айланиши мумкин бўлган қарийб 400 нафар хотин-қизга психологик, тиббий ва юридик ёрдам кўрсатди, уларга ҳунар ўргатди. 2015 йили “Истиқболли авлод” ижтимоий заиф хотин-қизларга пазандалик, компьютер саводхонлиги, бичиш-тикиш, косметология сирларини ўргатувчи Ўқув маркази ташкил этди.
“Хотин-қизлар кўпинча жинсий эксплуатацияга жалб қилинади. Улар жисмоний ва психологик травма олгач, яна нормал ҳолатга қайтиши учун кўп муддатга чўзиладиган тез ва ҳар томонлама ёрдамга эҳтиёж сезади. Тегишли равишда ғамхўрлик қилинмаса, улар қайтадан одам савдоси қурбонига айланиши эҳтимоли катта”, дея таъкидлади элчи Спратлен хоним.
Анжуман қатнашчилари одам савдосидан жабрланганларни реинтеграция қилиш бўйича қўлга киритилган тажрибалар билан ўртоқлашишди, лойиҳа натижаларини муҳокма этишди ҳамда бу иллатга қарши курашда давлат ва нодавлат ташкилотлари вакилларининг ҳамкорлигини мустаҳкамлаш бўйича тавсиялар ва келгуси режаларни ишлаб чиқишди.
Элчи Спратлен хоним “Одам савдосидан жабр кўрганларни реинтеграция қилиш” лойиҳасини юқори баҳолаб, “Истиқболли авлод” нодавлат ташкилотига миннатдорлик изҳор этди. Шунингдек, у Қўшма Штатлар “Истиқболли авлод” билан одам савдосининг олдини олиш ва жиноий жавобгарликка тортишга қаратилган бошқа бир лойиҳа устида ишлашни давом эттиришини айтиб ўтди. Бу лойиҳа ёрдамга муҳтож кишилар учун бевосита телефон алоқасини ишга тушириш, ҳуқуқ-тартибот органлари ходимларини одам савоси қурбонларини аниқлаш ва тергов ишлари олиб боришга ўқитишни ўз ичига олиб, бунда асосий эътибор одам савдоси қурбонларига қаратилади.
