2023 йил 18 январь, Самарқанд, Ўзбекистон – Бугун АҚШ Халқаро тараққиёт агентлиги (USAID) Одам савдосига қарши курашиш бўйича Самарқанд қуйи комиссияси ва “Истиқлол авлоди” нодавлат ташкилоти билан ҳамкорликда мигрантлар ва уларнинг оилалари учун иккинчи ахборот-маслаҳат марказини очди. Марказ меҳнат мигрантларини чет элда одам савдоси жабрланувчисига айланишининг олдини олиш учун ахборот билан таъминлайди. Шунингдек, қайтиб келган мигрантлар ва уларнинг оила аъзоларига ҳуқуқий маслаҳатлар бериб, касб-ҳунар таълимини ташкил қилади ва психологик хизмат кўрсатади.
Марказнинг очилиш маросимида сўзга чиққан USAIDнинг Ўзбекистондаги миссиясининг Демократия ва бошқарув бўлими директори Фей Хазелькорн USAID, Ўзбекистон ҳукумати ва фуқаролик жамияти ҳамкорлигини олқишлаб, шундай деди: “Марказ ‘ННТлар уйи’да жойлашган бўлиб, мигрантлар, уларнинг оилалари ва одам савдосидан омон қолганларни ҳам фуқаролик жамияти, ҳам ҳукумат кўрсатиши мумкин бўлган хизматлардан фойдаланишига ёрдам беради”.
2022 йилнинг март ойида USAID Жиззахда мигрантлар ва мигрантларнинг оилалари учун биринчи ахборот-маслаҳат марказини очган эди. Ўшандан бери Жиззах маркази одам савдосининг потенциал жабрланувчилари ва мигрантлар оилаларининг 120 га яқин мурожаатини кўриб чиқди ва одам савдосидан жабр кўрган 16 кишига ватанга қайтишда ёрдам кўрсатди. Қолган барча мурожаат этувчиларга маслаҳатлар берилиб, юридик ва ижтимоий хизматлар кўрсатилди.
Мигрантлар ресурс марказлари “Winrock International” томонидан амалга оширилаётган USAIDнинг Марказий Осиёда хавфсиз миграция дастурининг бир қисмидир. Дастур одам савдосининг олдини олишга, одам савдосидан жабрланганларни ҳимоя қилишга ва хабардорликни ошириш орқали хавфсиз миграцияни тарғиб этишга қаратилган.
USAID етакчи халқаро ривожланиш агентлиги бўлиб, барқарор ривожланишга эришишга ёрдам беради. Батафсил маълумот учун USAIDнинг Ўзбекистондаги веб-сайтига: https://www.usaid.gov/uzbekistan вa https://www.facebook.com/USAIDUzbekistan/ ташриф буюринг.
