Тошкент, Ўзбекистон, 2020 йил 2 октябрь – Бугун Америка Қўшма Штатлари ўзининг Халқаро тараққиёт агентлиги (USAID) томонидан молиялаштирилган Ўзбекистондаги “Қадр-қиммат ва ҳуқуқлар” / “Одам савдосига қарши кураш” дастурининг беш йиллик ютуқларини нишонлади. Дастур Халқаро Миграция Ташкилоти ва Инсон Ҳуқуқлари бўйича Ўзбекистон Республикаси Миллий Маркази билан биргаликда амалга оширилди.
“Қадр-қиммат ва ҳуқуқлар” дастури Ўзбекистон Ҳукумати ва мамлакат фуқаролик жамияти секторининг одам савдоси тўғрисидаги хабардорлигини оширишда кўмаклашиб, фуқаролар ва мигрантларнинг ўз меҳнатига оид ва инсон ҳуқуқлари тўғрисидаги билимларини оширишга алоҳида эътибор қаратган.
“Қадр-қиммат ва ҳуқуқлар” дастури орқали 1700 дан ортиқ одам савдоси жабрдийдалари, шу жумладан ҳимоясиз мигрантлар ва оилавий зўравонлик қурбонлари бўлган мигрантлар уйларига қайтиб, психологик ёрдам ва реинтеграция учун махсус кўмак олишди. Дастурда, шунингдек, 95 мингдан ортиқ шахсларга одам савдоси хатарлари бўйича амалий маслаҳатлар берилди. Бундан ташқари, “Қадр-қиммат ва ҳуқуқлар” дастури орқали амалга оширилган “Одам савдосига қарши 30 кун” акцияси давомида маҳаллий ҳамкорлар орқали бир миллионга яқин одам қамраб олинди.
«Биз биламизки, одам савдосига қарши кураш Ўзбекистон Ҳукуматининг кун тартибидаги муҳим масаладир», – деди АҚШнинг Ўзбекистондаги элчиси Дениэл Розенблюм. – «Сўнгги икки йил ичида ушбу соҳада 15 дан ортиқ норматив-ҳуқуқий ҳужжатлар қабул қилинди, шу жумладан, Одам савдоси ва мажбурий меҳнатга қарши курашиш бўйича Миллий комиссия ва Миллий маърузачи институти ташкил этилди. Биз одам савдосига чек қўйиш учун глобал курашда Ўзбекистонни қўллаб-қувватлашга тайёрмиз», – дея қўшимча қилди элчи.
АҚШ Ҳукумати 2002 йилдан буён Ўзбекистонда одам савдосига қарши курашиш бўйича USAID орқали иш олиб бормоқда. 2005 йилдан бошлаб USAID мамлакатда одам савдоси тўғрисида хабардорликни ошириш ва ушбу жиноят қурбонларига ёрдам кўрсатиш учун 6 миллион АҚШ долларидан ортиқ маблағ сарфлади.
USAID Ўзбекистон Ҳукумати билан мамлакат иқтисодиётини диверсификация қилиш ва минтақавий савдони кучайтириш, соғлиқ учун жиддий таҳдидларни, шу жумладан, COVID-19ни бартараф этиш ва аҳоли эҳтиёжларини қондириш, ҳукуматнинг салоҳиятини ошириш учун шериклик қилмоқда. Қўшимча маълумот олиш учун қуйидаги манзилга мурожаат қилинг: https://www.usaid.gov/central-asia-regional ва USAIDнинг Марказий Осиёдаги ваколатхонаси Фейсбукдаги саҳифасига ташриф буюринг: https://www.facebook.com/USAIDCentralAsia
