2023 йил 31 октябрь, Тошкент, Ўзбекистон – АҚШ халқаро тараққиёт агентлиги (USAID) Ўзбекистон Соғлиқни сақлаш вазирлиги ва Аbt Associates билан ҳамкорликда «Туберкулёздан холи Ўзбекистон» беш йиллик ташаббусини бошлади. Унга кўра, бутун мамлакат бўйлаб кенг қамровли қўллаб-қувватлаш хизматларини тақдим этиш ва туберкулёзга қарши муҳим дори воситаларидан фойдаланиш имкониятини кенгайтириш учун 18 миллион доллар сармоя киритилмоқда.
Ўзбекистон соғлиқни сақлаш тизимига, шунингдек, аҳоли саломатлиги ва мамлакатнинг иқтисодий ривожланишига катта хавф туғдирадиган кўп дориларга чидамли туберкулёз касаллигининг юқори кўрсаткичларига дуч келмоқда. Ўзбекистон барқарор ривожланмоқда, аммо туберкулёз касаллиги аҳоли саломатлиги учун энг жиддий тахдидлардан бири бўлиб қолмоқда. Ўзбекистон Соғлиқни сақлаш вазирлиги маълумотларига кўра, 2022 йилда мамлакатда туберкулёз касаллигининг янги ҳолатларининг саккиз фоизи даволаш учун энг кўп ишлатиладиган ва самарали ҳисобланадиган иккита дори воситасига қаршилик кўрсатган.
USAID АҚШ хукуматининг туберкулёзга қарши кураш бўйича глобал саъй-ҳаракатларига раҳбарлик қилади ва туберкулёзга қарши курашда Ўзбекистон ҳукуматининг фахрли ҳамкори ҳисобланади. USAIDнинг 2023-2030 йилларга мўлжалланган глобал туберкулёзга қарши стратегияси туберкулёздан холи дунё ҳақидаги умумий тасаввуримизни рўёбга чиқаришга қаратилган. Дунёдаги энг йирик икки томонлама донор сифатида USAID туберкулёз касаллигини йўқ қилиш бўйича саъй-ҳаракатларни тезлаштириш учун янги инновациялар ва тадқиқотлардан фойдаланади.
USAID 2023 йил 22 сентябрда бўлиб ўтган Бирлашган Миллатлар Ташкилотининг туберкулёз касаллиги бўйича олий даражадаги йиғилишида фаол иштирок этди. USAID маъмурияти Глобал Соғлиқни сақлаш бўйича ёрдамчиси Атул Гаванде (Atul Gawande) туберкулёзга қарши кураш бўйича кўплаб тадбирларда иштирок этиб, юқори даражадаги йиғилиш билан якунланди. У туберкулёзга қарши янада масъулиятли ва инклюзив чора-тадбирларга эришиш стратегиясини ишлаб чиқишни тезлаштирадиган кенгайтирилган тадбирлар тўплами бўлган туберкулёзга қарши Глобал Акселераторни (Global Accelerator) ишга туширди.
1993 йилдан 2023 йилгача АҚШ ҳукуматининг Ўзбекистонга соғлиқни сақлаш соҳасидаги ёрдамининг умумий миқдори 155 миллион доллардан зиёдни ташкил этди, шундан қарийб 60 миллион доллари туберкулёз касаллигига қарши курашга йўналтирилди. “Туберкулёздан холи Ўзбекистон” лойиҳаси АҚШ ҳукуматининг туберкулёз касаллигининг олдини олиш, аниқлаш, даволаш, туберкулёз касаллигини стигматизациясини камайтириш, шунингдек, тиббий ахборот тизимларини такомиллаштириш, шу жумладан соғлиқни сақлашни молиялаштириш бўйича ислоҳотларга қатъий содиқлигини тасдиқлайди. Бундан ташқари, АҚШ ва Ўзбекистон ўртасидаги ушбу икки томонлама ҳамкорлик мамлакатнинг пандемия тахдидларининг олдини олиш, аниқлаш ва уларга жавоб бериш салоҳиятини мустаҳкамлайди.
Қўшимча маълумот мана бу ерда: https://www.usaid.gov/uzbekistan.
