Тошкент, Ўзбекистон, 24 март, 2018 й. – Сил касаллиги Ўзбекистонда омма саломатлигига кўрсатаётган таъсирга эътибор жалб этиш мақсадида АҚШнинг Ўзбекистондаги элчихонаси вакиллари бугун Ўзбекистон ҳукумати ва Жаҳон соғлиқни сақлаш ташкилоти вакилларидан иборат бўлган ҳамкасблари билан Жаҳон сил касаллигига қарши кураш кунини нишонлаш учун йиғилдилар. Дунё бўйлаб ҳар йили 24 март куни, яъни Роберт Кох томонидан 1882 йили сил касаллиги патогени аниқланган кунда нишонланувчи Жаҳон сил касаллигига қарши кураш куни ушбу ҳалок қилувчи, аммо даволаш мумкин бўлган касалликнинг саломатликка, шунингдек, ижтимоий ва иқтисодий фаровонликка барбод этувчи таъсирига эътиборни қаратади.
АҚШ Халқаро ҳамкорлик агентлиги (ЮСАИД)нинг Ўзбекистондаги ваколатхонаси раҳбари жаноб Гэри Робинс Ўзбекистон Республикаси Соғлиқни сақлаш вазирлиги, Республика ихтисослаштирилган фтизиатрия ва пульмонология илмий-амалий тиббиёт маркази (Республика СК ва пульмонология маркази), Жаҳон соғлиқни сақлаш ташкилоти (ЖССТ) вакиллари ҳамда СК соҳасидаги тиббиёт ходимлари, фуқаролик жамияти ташкилотлари ва оммавий ахборот воситалари вакиллари билан биргаликда сил касаллигининг олдини олиш ва уни тизгинлаш ишида жонкуярлик кўрсатган инсонларни тақдирлаш маросимида иштирок этди.
2018 йили Жаҳон сил касаллигига қарши курашиш кунинг мавзуси сифатида белгиланган “Қидирилмоқда: Сил касаллигидан ҳоли бўлган дунё етакчилари. Сиз тарихни ярата оласиз” хитобига ҳамоҳанг равишда ЮСАИД ва унинг Ўзбекистондаги ҳамкорлари сил касаллигига қарши курашишда Ўзбекистонлик фаолларнинг сил касаллигига чалинган инсонларга меҳр кўрсатиш, омма хабардорлигини ошириш ҳамда СК таъсирига учраган инсонларнинг жамият томонидан қабул қилинишларига эришиш йўналишидаги ҳаракатларга қўшган хиссалари салмоқли бўлганлигини таъкидладилар.
Ўтган бир неча йил ичида Ўзбекистон СКни тизгинлаш ишида улкан натижаларни намойиш этди. СКга чалиниш ва ундан ҳалок бўлиш кўрсаткичлари кескин камайди ва айни чоғда, СК билан боғлиқ бўлган хизматлардан фойдаланиш имкониятлари ва уларнинг сифати сезиларли даражада яхшиланди. Бу йўлдаги ҳаракатлар давом этмоқда, аммо, хизматларни янада такомиллаштириш, айниқса, бундай хизматларни аҳолининг ижтимоий жиҳатдан заиф бўлган гуруҳларига етказиб бериш ҳамда СК таъсирига учраган инсонларнинг шаъни ва қадри-қимматига муносиб ҳурмат кўрсатилишини таъминлаш борасида қилинадиган ишлар талайгина.
“СКга қарши курашдаги кўзланган ютуқларнинг энг муҳимларидан бири – (ушбу касаллик ва унга чалинган инсонлар) жамият томонидан тўғри қабул қилинишига эришишдир. Омманинг, агар бу касалликка чалиган инсонлар тўғри ва ўз вақтида даволансалар, ундан бутунлай фориғ бўлишлари мумкинликларини англашига эришиш учун давлат идоралари, донорлар, шифокорлар, ҳамширалар ва ОАВлари биргаликда ҳаракат қилишлари лозим бўлади”, – деб таъкидлайди жаноб Робинс.
17 йил давомида ЮСАИД Ўзбекистон Республикаси Соғлиқни сақлаш вазирлигига Сил касаллигига қарши курашиш миллий дастурини амалга оширишида кўмаклашиб келмоқда. Ушбу ёрдам СКнинг олдини олиш, ташҳис қўйиш ва даволашнинг янада самарали ва кўпчилик томонидан, айниқса, аҳолининг ижтимоий жиҳатдан заиф гуруҳлари томонидан фойдаланилиши мумкин бўлган услубларини тақдим этиш тарзида намоён бўлди. ЮСАИДнинг “СКни тизгинлаш дастури” ва “СКга қарши курашиш дастури”нинг асосий вазифаси Ўзбекистонда СК юкини камайтириш ҳамда мамлакатда СКнинг кўп сонли дориларга турғун бўлган кўринишларининг олдини олишдан иборат. ЮСАИДнинг СКга қарши курашиш дастурлари кенг қамровли тадбирлар ва фаолиятларни ўз ичига олади. Бундайларга соғлиқни сақлаш тизимини кучайтириш мақсадида тиббиёт ходимлари учун ўқув-машғулотлари ўтказиш, идоралараро мувофиқлаштириш ва ҳамкорликни такомиллаштириш ҳамда СК бўйича ташҳис қўйиш ва уни даволаш хизматларидан фойдаланиш имкониятларини кенгайтириш кабилар киради.
