5 июнь куни, Қўшма Штатлар Ўзбекистонга COVID-19 га қарши қарши курашда кўрсатаётган ёрдамнинг бир қисми сифатида, АҚШ элчихонаси Ўзбекистон Санитария-эпидемиологик осойишталик агентлигига коронавирус тести ўтказиш учун зарур воситаларни етказиб берди.
“Соғлиқни сақлаш вазирлигидаги ҳамкорларимиз билан бирга ишлаб, биз ушбу хавфли вирусни аниқлаш ишини яхшилаймиз, касалликка чалинганлар сонини камайтирамиз ва Ўзбекистонда одамлар ҳаётини сақлаб қоламиз”,- деди элчи Даниэл Розенблюм.
Бу USAID ҳадя этаётган тест воситаларининг биринчи тўпламидир. У 15000 та тест ўтказишга етарли QIAGEN RNA реагентларини жамлаган 60 та қутидан иборат. 10000 та тест учун мўлжалланган яна 40 та шундай қути бир неча ҳафтадан сўнг Ўзбекистонга етиб келади.
“Соғлиқни сақлаш вазирлиги ва Санитария-эпидемиологик осойишталик агентлиги номидан ушбу ёрдам учун Қўшма Штатларга миннатдорлик билдирамиз. Ушбу реагентлар коронавирусга қарши курашимизда асқотади ҳамда ватандошларимизнинг соғлиги ва фаровонлигини яхшилайди”,- деди агентлик директори Баҳодир Юсупалиев.
USAID Ўзбекистонга коронавирусга қарши кураш учун 3,9 миллион доллар бермоқда. Бу ёрдам лабораторияларни кенг кўламли тестлар ўтказишга тайёрлаш, соғлиқни сақлаш муассасаларида инфекция тарқалишининг олдини олиш ва назорат қилиш, COVID-19 га оид тезкор чораларни такомиллаштириш, касаллик юқтирганлар ҳолатини бошқариш тизимини кучайтириш, вирус тўғрисидаги дезинформацияга қарши курашиш ҳамда жамоаларни ҳамжиҳатликда ишлашга жалб қилишни ўз ичига олади.
COVID-19 тарқала бошлангандан буён АҚШ ҳукумати хоссатан пандемияга қарши курашга қаратилган халқаро кўмак учун бир миллиарддан ортиқ маблағ ажратди. Ушбу маблағ замонавий шамоллатиш ускуналари билан таъминлаш, соғлиқни сақлаш бўйича билимларни ошириш, тиббиёт ходимларини ҳимоя қилиш, лаборатория тизимини мустаҳкамлаш, касаллик назорати ва тезкор жавоб қобилиятини кучайтириш орқали дунёдаги 120 дан ортиқ мамлакатда кишилар ҳаётини сақлашда ишлатилади.
USAID COVID-19 бўйича амалга ошираётган фаолият ҳақида батафсил маълумотни мана бу ерда ўқишингиз мумкин: https://www.usaid.gov/coronavirus-covid-19.
