АҚШ Марказий Қўмондонлиги қўмондони генерал Жозеф Вотелнинг Марказий ва Жанубий Осиё мамлакатлари бош штаблари бошлиқларининг конференцияси якунига оид баёноти
Тошкент, Ўзбекистон
Мен Марказий ва Жанубий Осиё мамлакатлари бош штаблари бошлиқларининг конференцияси Ўзбекистонда ташкил этилгани учун Президент Шавкат Мирзиёев ва Мудофаа вазирига миннатдорлик билдирмоқчиман. АҚШ Марказий Қўмондонлиги билан биргаликда ушбу конференцияни ўтказар экан, Ўзбекистон Марказий ва Жанубий Осиёда хавфсизлик ва барқарорликни таъминлашда етакчилик ролини ўйнамоқда. Мен Марказий ва Жанубий Осиё минтақасидан келиб иштирок этган давлатларга минтақавий хавфсизликка ўз садоқатларини намойиш этганликлари ва минтақа барқарорлигига бўлган таҳдидларни бартараф қилишга қаратилган мулоқот ва ҳамкорликни илгари суришни давом эттираётганлари учун раҳмат айтмоқчиман. Қўшма Штатлар минтақадаги шерикларимизнинг барқарорлиги ва суверенитетини мустаҳкамлашга ҳисса қўшиш учун конструктив йўлларни излаган ҳолда ҳамкорликни ривожлантириш ва олға суриш тарафдоридир. 
Мен Президент Мирзиёевга ушбу анжуман муваффақиятли ўтишига шахсий қизиқиш билдириб, минтақавий хавфсизликни ривожлантиришда келгусида қандай ҳамкорлик қилишимиз ҳақидаги фикрлари учун ўз ташаккуримни изҳор этаман. Мен Вазир Қурбоновни яқинда Мудофаа вазири лавозимига тайинлангани ва ушбу конференцияни муваффақиятли ўтказишда етакчилик қилгани учун табриклайман. Ниҳоят, менга ҳамда Марказий ва Жанубий Осиё мамлакатларининг барча бош штаблари бошлиқларига кўрсатган меҳмондўстлиги учун Ўзбекистон халқига миннатдорлик изҳор этаман.
