АҚШ элчиси Дэниел Розенблюм

Дэниел Розенблюм АҚШнинг Ўзбекистондаги элчиси сифатида 2019 йил 9 май куни қасамёдга келтирилди. 2014 йил июль ойидан 2018 йил июлига қадар жаноб Розенблюм  Давлат департаментининг Жанубий ва Марказий Осиё Бюросида Давлат котиби ёрдамчисининг муовини лавозимида ишлаган. Унинг вазифаси доирасига Марказий Осиёдаги бешта давлат – Қозоғистон, Қирғизистон, Тожикистон, Туркманистон ва Ўзбекистон – билан АҚШ сиёсати ҳамда дипломатик алоқаларни бошқариш кирган.  У Давлат департаментининг ушбу минтақадаги олтита дипломатик миссиясини қўллаб-қувватлаш,  сиёсий ва дастурий устувор йўналишларни белгилашда иштирок этди ва тез-тез жамоатчилик вакили сифатида хизмат қилди. Ушбу лавозимнинг сўнгги йили давомида жаноб Розенблюм  Бюронинг бутун минтақавий ва жамоатчилик дипломатиясига оид фаолиятини,  шу жумладан,  трансмиллий иқтисодий ва хавфсизлик масалаларини,  таълим ва маданий алмашинувларни,  шунингдек,  Жанубий ва Марказий Осиёда оммавий ахборот воситалари билан мулоқот бўйича ишларни назорат қилди.

2008-2014 йиллар давомида Розенблюм  АҚШнинг Европа,  Евроосиё ва Марказий Осиёга кўмак бериш бўйича мувофиқлаштирувчиси бўлиб,  ҳар йили 1 миллиард АҚШ долларидан ортиқ бўлган ташқи ёрдам буджетларини стратегик ва самарали тақсимлаш ва сарфлашни таъминлашга масъул бўлган.  У ва унинг жамоаси 30 дан ортиқ мамлакатда иш олиб бораётган ўнлаб АҚШ давлат идораларининг саъй-ҳаракатлари, жумладан иқтисодий ислоҳотларни қўллаб-қувватлаш,  демократик институтлар ва қонун устуворлигини таъминлаш,  хавфсизлик сектори муассасаларининг салоҳиятини ошириш ва инсонпарварлик ёрдами орқали инсонлар машаққатини енгиллаштириш каби фаолиятини мувофиқлаштирган. Бундан ташқари, жаноб Розенблюм бошқа халқаро донорлар, жумладан, Европа Иттифоқи ва кўп томонлама ривожланиш банклари билан ҳамкорлик қилишда АҚШнинг асосий вакили бўлиб хизмат қилган.

1997-2008 йиллар мобайнида жаноб Розенблюм АҚШ кўмаги координатори офисида турли лавозимларни эгаллаган, жумладан, мувофиқлаштирувчи муовини, Евроосиё бўлими директори ва иқтисодий дастурларнинг махсус маслаҳатчиси бўлган.  У Россиянинг бир неча ҳудудлари учун иқтисодий ташаббусларни ишлаб чиққан, минтақада фаолият юритувчи ва АҚШ томонидан қўллаб-қувватланган ўнта инвестиция фонди ва Давлат департаменти орасида боғловчи шахс сифатида фаолият юритган.  Украина, Грузия ва Қирғизистонда бўлиб ўтган ички талотумлардан сўнг, Косово ўз мустақиллигини эълон қилганидан кейин ушбу мамлакатларга ёрдам пакетларини ишлаб чиқишда ёрдам берган.

Давлат департаментига келгунига қадар жаноб Розенблюм Озод касаба уюшмалар институтида (FTUI) бош дастур координатори сифатида олти йил фаолият юритган. АҚШ Халқаро тараққиёт агентлиги ва Демократия миллий жамғармаси грантлари ёрдамида FTUI собиқ Совет Иттифоқи ва Шарқий Европада мустақил касаба уюшмалари учун таълим дастурларини амалга оширган ва техник ёрдам кўрсатган. Жаноб Розенблюм Москва, Киев, Алмати ва Варшава шаҳарларидаги ҳудудий идоралар фаолиятини бошқарган. У, шунингдек, собиқ Совет Иттифоқидаги касаба уюшмалар ҳаракати жамоатчилик вакили ва бозор иқтисодиётига ўтиш билан боғлиқ ижтимоий муаммоларни кўтарган вакил сифатида хизмат қилди.

1985-89 йилларда жаноб Розенблюм Сенатор Карл Левиннинг ҳуқуқий масалалар бўйича ёрдамчиси сифатида фаолият юритиб, сенаторга ташқи сиёсат, савдо, транспорт, адлия ва ветеранлар масалалари бўйича маслаҳат берган. У турли соҳаларда, шу жумладан Америка автомобилсозлик саноатининг рақобатбардошлигини таъминлашда сенаторга ёрдам бериб,  савдо битимлари АҚШнинг ташқи бозорларга экспорт қилишига имкон яратиш,  суд номзодларини баҳолаш,  фахрийларнинг манфаатлари ва халқаро инсон ҳуқуқларини ҳимоя қилишни таъминлаган.

Жаноб Розенблюм Йель университетида тарих фани бўйича бакалавр, Жон Ҳопкинс университетининг илғор халқаро тадқиқотлар факультетида советология ва халқаро иқтисод бўйича магистр унвонини олган.  Оилали, 20 ёшли ўғли ва 16 ёшли қизи бор.

Элчи Розенблюмни унинг “Twitter”даги саҳифасида кузатиб боришингиз мумкин.