Ўзбекистон Республикаси Халқ таълими вазири Шерзод Шерматов ва АҚШнинг Ўзбекистондаги элчиси Дэниел Розенблюм иштирокида Тошкент шаҳридаги 295-мактабда Ўзбекистон бўйлаб мактаб ва университетларда дарс берадиган, АҚШдан ташриф буюрган 27 нафар инглиз тили ўқитувчиси ва олимлардан иборат янги келган гуруҳни кутиб олиш маросими бўлиб ўтди. Январь ойида келган ва икки ҳафталик карантин даврини тамомлаган гуруҳ коронавирус пандемияси бошланганидан буён Марказий Осиёга ташриф буюрган АҚШ алмашинув иштирокчиларининг биринчи гуруҳидир.
“Сизларни бу ерда кутиб олиб, ушбу маросимни Ўзбекистон ҳукумати билан биргаликда нишонлаётганимиздан бағоятда хурсандман. Сизлар икки мамлакат ўртасидаги муносабатларни мустаҳкамлаш, инглиз тилини хорижий тил сифатида ўқитиш, илмий тадқиқотлар ва педагогика бўйича мутахассислигингизни ўзбекистонлик ҳамкасбларингиз билан баҳам кўриш учун муҳим сафарга отландингиз. Ҳар бирингиз мамлакат бўйлаб синфхоналарда ва таълим муассасаларида муҳим аҳамиятга молик ишларга пойдевор бўлиб хизмат қиласиз. Инглиз тилида сўзлашувчи мутахассис сифатида сизлар ҳукуматларимизнинг инглиз тилида равон сўзлашувчи битирувчиларни кўпайтириш ва Ўзбекистон ёшларининг таълимга оид ҳамда иқтисодий имкониятларини кенгайтириш учун биргаликдаги мақсадларимизга катта ҳисса қўшасиз”,- деди элчи Розенблюм ўзининг табрик нутқида.
“Ўзбекистон Президенти ўзининг Парламентга қилган мурожаатида чет тилларини ўрганишни бу йилги устувор вазифалардан бири, дея таъкидлади. Шу боис жойларда инглиз тилини ўргатишни янада яхшилашга кўмаклашиши учун биз АҚШдан мутахассисларни таклиф этдик. Бу бизга юқори мақсадларга эга “English Speaking Nation” лойиҳамизни амалга оширишда яқиндан ёрдам беради,”- деди вазир Шерматов.
Ўқитувчиларнинг аксари маҳаллий ўқитувчилар даврасига қўшилиб, синфхоналардаги дарсларда бевосита иштирок этади. Гуруҳдаги етти киши эса “English Speaking Nation” дастури доирасидаги “Мураббий-тренерлар” номли пилот лойиҳада қатнашади. Унинг мақсади Ўзбекистон ўрта макатабларидаги чет тили ўқитувчиларига касбий ривожланиш ва малака оширишда амалий ёрдам беришдан иборат. Ушбу дастурни АҚШ элчихонаси жамоатчилик билан алоқалар бўлими гранти асосида Халқ таълими вазирлиги билан ҳамкорликда Америка кенгашлари амалга оширади.
Америкалик ўқитувчилар ва ўзбекистонлик ўқувчилар 9 февралда таваллуди нишонланадиган буюк ўзбек мутафаккир шоири Алишер Навоий хотирасига чуқур ҳурмат бажо келтиришди. Чоршанба куни АҚШлик муаллимлар ўз ўқитувчилик фаолиятларини бошлаш учун мактабларга йўл олишади. Улар Ўзбекистон маданияти ва тарихи ҳақида кўпроқ билимга эга бўлиш истагини билдиришди.
