2021 йил 10 июнь, Тошкент, Ўзбекистон — Бугун Микаэла Мередит АҚШ Халқаро тараққиёт агентлиги (USAID)нинг Ўзбекистондаги Миссиясининг биринчи директори сифатида ўз вазифасини бошлади. Ривожланиш соҳасида қарийб 30 йиллик тажрибага эга Микаэла Мередит ушбу лавозимга тайинланишидан олдин 2018 йилдан 2021 йилгача USAIDнинг Албаниядаги вакили ва 2015 йилдан 2018 йилгача Озарбайжонда USAID Миссиясининг директори бўлиб ишлаган. Шунингдек, у Яман, Нигерия, Конго Демократик Республикаси ва пойтахт Вашингтонда турли лавозимларда фаолият юритган. У АҚШнинг Нью-Йоркдаги Колумбия Университети Халқаро алоқалар мактабининг магистр даражасига эга.
«Биз бугун USAIDнинг Ўзбекистон ҳукумати ва халқи билан шериклигининг янги саҳифаси бошлаётганини гувоҳи бўляпмиз, – деди Алан Мельцер, АҚШнинг Ўзбекистондаги муваққат ишлари вакили. – USAIDнинг кенгайтирилган иштироки Ўзбекистонни фаол хусусий сектор ва фуқаролик жамиятини барпо этиш, иқлим ўзгариши, таълим ва соғлиқни сақлаш тизимларини модернизация қилиш ва самарали бошқарувни мустаҳкамлашда қўллаб-қувватлаш бўйича умумий қобилиятимизни оширади».
«Янги Миссиянинг ташкил этилиши АҚШнинг 2020 йилда қабул қилинган ва Байден маъмурияти томонидан яқинда қўллаб-қувватланган Марказий Осиё стратегиясининг бир қисми эди», – деди Микаэла Мередит. «Мен учун USAID Миссиясининг Ўзбекистондаги биринчи директори бўлиш катта шарафдир. Бу муҳим вазифани мен бутун масъулият билан бошлайман», – қўшимча қилди у.
USAIDнинг Ўзбекистондаги икки томонлама миссияси 2020 йил сентябрь ойида ташкил этилган. Янги Миссия АҚШ Ҳукуматининг Ўзбекистон Ҳукумати ва халқи олдидаги узоқ муддатли мажбуриятини таъкидлайди.
Ўзбекистонда USAID иқтисодий ўсишни яхшилаш, савдо-сотиқ ва хусусий секторни қўллаб-қувватлашга қаратилган ташаббусларни қўллаб-қувватлайди. Бошқа устувор йўналишлар қаторига таълим, сув хўжалиги, соғлиқни сақлаш, қонун устуворлиги ва фуқароларнинг одил судловдан фойдаланиш имкониятлари, шунингдек қайта тикланадиган энергия, хавфсиз миграция ва одам савдосига қарши кураш масалалари киради.
USAIDнинг Ўзбекистон билан ҳамкорлиги мамлакат мустақилликка эришганидан кўп ўтмай бошланди. 1992 йилдан бери Америка халқи USAID орқали гуллаб-яшнаётган Ўзбекистоннинг ривожланишини қўллаб-қувватловчи дастурларга 500 миллион доллардан кўпроқ маблағ ажратди.
# # #
USAID Ўзбекистон ҳукумати билан мамлакат иқтисодиётини диверсификация қилиш ва минтақавий савдони ошириш, соғлиқ учун жиддий таҳдидларни, шу жумладан COVID-19ни бартараф этиш ва ҳукуматнинг аҳоли эҳтиёжларини қондириш учун салоҳиятини ошириш учун ҳамкорлик қилмоқда. Қўшимча маълумот учун ташриф буюринг: https://www.usaid.gov/uzbekistan.
