29 август куни АҚШ Давлат котиби ёрдамчиси ўринбосари жаноб Розенблум ва АҚШнинг Ўзбекистондаги элчиси Спратлен хоним фуқаролик ишлари бўйича Мирзо Улуғбек туманлараро судига ташриф буюрдилар.
Ташриф Ўзбекистон Республикаси Олий суди, АҚШ Халқаро Тараққиёт Агентлиги (USAID) ва Бирлашган Миллатлар Ташкилоти Тараққиёт Дастури (БМТТД)нинг «Ўзбекистонда қонун устуворлиги йўлида шериклик» қўшма лойиҳаси доирасида ташкил этилди. Мазкур фуқаролик суди E-SUD номли электрон суд бошқаруви тизими билан жиҳозланган Ўзбекистондаги илк икки фуқаролик судларидан бири ҳисобланади. Лойиҳа ихтисослаштирилган дастурий таьминот ва информацион технологияларни суд бошқаруви тизимига тадбиқ этиш юзасидан судья ва суд ходимларининг билим ва кўникмаларини оширишда яқиндан кўмак кўрсатди. АҚШ Давлат котиби ёрдамчиси ўринбосари жаноб Розенблум ва бошқа меҳмонларга лойиҳадан кўзланган мақсадлар ва эришилган натижалар хусусида қисқача маълумот берилди. E-SUD тизимининг икки пилот фуқаролик судларида тадбиқ этилиши, Олий хўжалик суди иш тартибининг таҳлил қилиниши ва уни такомиллаштириш бўйича таклифлар ишлаб чиқилиши, Олий суд веб-саҳифасининг янгиланиши ҳамда судьялар учун ўқув дастурининг такомиллаштирилиши эришилган натижалар жумласидандир.
Шундан сўнг, суд раиси ва ходимлари суднинг фаолиятида суд ишини рўйхатга олинишидан бошлаб суд қарорининг қабул қилинишигача бўлган жараёнда E-SUD электрон тизимининг қўлланилишини бевосита намойиш этишди. Лойиҳа доирасида 2015 йилнинг сўнгига қадар Тошкент шаҳри ва Тошкент вилоятидаги яна қўшимча олтита фуқаролик судларида E-SUD тизимини жорий этиш кўзда тутилган.
